Хушдоманам талоқамро дод

Номаҳо, ТОҶИКИСТОН, ХАБАРИ ТОЗА

Салом хонандагони азиз! Ҳанӯз ҳангоми мактабхонӣ хостгоронам аз мӯи сарам зиёд буданд.

Ҳарчанд падарам ҷавоби рад медод, ба ҷойи кам шудан шуморашон торафт бештар мегашт. Аз байни хостгорон як нафараш бисёр хира буд, аз дар зананд аз дарича даромада “дардатона гирам, балотона гирам, хоки поятон шавам” гӯён, зорию тавалло мекард, ки хоҳиши ӯро рад накунанд. Ҳамин тавр ду сол хирагӣ карда ниҳоят ӯ дили падарамро ёфт ва маро келин кард. Пеш аз фотиҳа модари домод “духтаратонро рӯйи даст мегардонам” гӯён, лоф мезад, вале…

Тӯйи мо бисёр бодабдаба гузашт. Ман домодро бори аввал дар шаби никоҳ дида бошам ҳам, бо як нигоҳ ошиқи зораш гаштам, чунки бачаи хушқаду қомат ва сиёҳчашму сиёҳабрӯи базебе буд. Нигоҳи гармаш аз он гувоҳӣ медод, ки ҷавони меҳрубон ва нармдил аст. Дар дил Худоро шукр мегуфтам, ки маро бо чунин ҷавони зебо ҳамқисмат гардонд.

Ҳамин тавр тӯямон гузашту зиндагии мустақилонаи мо оғоз ёфт. Шавҳарам нисбати ман бисёр меҳрубон буд, вале ситораам бо ситораи хушдоманам рост наомад. Вай маро худаш хуш карда бошад ҳам, баъди тӯй душмани ҷонам гашт. Намедонам сабабаш рашк буд ё чизи дигар, ки шабу нимашаб бо ҳар баҳона ба хонаи хоби мо даромада, бо ман ҷангу ҷанҷол мекард. Соати 4-и саҳар, ҳанӯз хурӯс бонг назада садои доду фиғони хушдомани ман ба фалак мепечид: “Хез, ҳавлиро рӯб, ҷойхоби маро ҷамъ карда наҳорӣ тайёр кун, ман туро барои хоб рафтан келин накардаам…”

Шавҳарам аз доду фарёди модараш ба ҷон расида бошад ҳам, чизе гуфта наметавонист. Найранги дигари хушдоманам он буд, ки баҳудаю беҳуда ба хонаи хоби мо даромада ҳама ҷоро такорӯ мекард. Мабодо чӣ кофтанашро пурсам, қиёматро қоим карда дод мезад, ки дар вақти мактабхониамон падари ту ручкаҳои мо, духтарҳоро медуздид, ту ҳам духтари ҳамон дузд ҳастӣ, чизу чораи хонаи маро дуздида дар хонаат пинҳон мекунӣ ва ғайраю ҳоказо…

Ҷонам аз туҳмату иғвои хушдоман ба лабам расида бошад ҳам, чизе намегуфтам, чунки шавҳарамро сахт дӯст медоштам ва хонавайрон шудан намехостам, аммо модаршӯям коре кард, ки ҳеҷ ба ақли солим рост намеояд. Як саҳар ҳанӯз мо аз хоб бедор нашуда, хушдоманам зада ба хонаи хоби мо даромад ва мани нимаурёнро, ки дар бағали шавҳарам хоб будам, аз мӯйи сарам кашолакунон аз ҷогаҳ хезонд ва ба бари рӯям чанд шаппотӣ зад. Сабаб пурсидам. Ту ангуштарини маро дуздидӣ гуфта қиёматро қоим кард. Бо тамоми муқаддасоти олам қасам хӯрдам, ки аз мурдани худам хабар дораму аз ангуштарини ӯ не, вале кампир “ҳозир ман туро шарманда мекунам” гӯён, аз ҷевон сандуқчаи тилловориҳои маро гирифт ва ангуштаринеро, ки падарам ба ман аз Маскав туҳфа оварда буд, аз дарунаш бароварда дод зад: “Дузди худозада, ангуштарини маро дар ин ҷо пинҳон кардию боз қасам мехӯрӣ, ки нагирифтаӣ! Ҳозир ман рӯйи туро сиёҳ мекунам!”

Вай инро гуфта аз писараш талаб намуд, ки талоқи маро диҳад, вале шавҳарам рад кард, чунки туҳмат будани даъвои модарашро хуб медонист. Ангуштарини ман ба ангуштарини хушдоманам монанд бошад ҳам, нисбатан ғафстар ва вазнаш зиёд буд. Шавҳарам ин ангуштаринро борҳо дар дасти ман дида буд ва хуб медонист, ки онро пеш аз тӯй падарам барои ман харидааст. “Оча, хонаи хобатонро дурусттар кобед, ангуштаринатон дар ҳамон ҷо афтидагист” гӯён, шавҳарам хост моро ба мусолиҳа биёрад, аммо хушдоманам аз аспи ҷаҳл нафаромада дод зад: “Занкалони худозада, агар ту ҷавоби ин дуздро дода натавонӣ, ин корро ман ба ҷоят мекунам. Ман туро ба ҷойи писарам се талоқ кардам, аз хонаи ман зуд дафъ шав, дузди разил” гӯён, модаршӯям маро зада-зада таги як курта аз дар берун кард. Гириста-гириста ба хонаи модарам омадам ва ҳамаашро нақл кардам. Пайвандонам маслиҳат доданд, ки дигар ёди он ҷаҳаннам накунам.  Баъдтар маълум шуд, ки ангуштарини хушдоманамро наберааш дуздида фурӯхтааст ва ба пулаш телефон харидааст, аммо оби рехтаро дигар бардошта намешуд.

Инак, 50 рӯз мешавад, ки ман дар хонаи падарам ҳастам, вале то имрӯз шавҳарам ягон бор занг назадааст. Падарам мегӯяд, ки талоқатро гир, туро худамон саробон мешавем, вале шавҳарамро дӯст медорам ва намехоҳам аз рӯйи як туҳмат зиндагиам вайрон шавад.

Аз хонандагони азизи “Оила” пурсиданиям, ки оё ман ҳақи ба хонаи шавҳарам баргаштанро дорам ё не?

Моҳрухсор, хонанда


Поделиться новостью в социальных сетях:

9 комментарий

  • Салом. Апаҷон таги сабр тилло аст. Вакте дар ҳаки касе ноҳакию туҳмат куни вичдони одамизод намегузорад ором бошад. Шумо аз баҳри Аллоҳ якбор ба хонаи шавҳаратон равед агар шавҳартон талок дод пас метавонед наравед. Вай хуштомантон магар дар никоҳи шумо астки ҳакки талок додан дорад? Асос шумо дар назди Худо мутаҳам нестед. Офарини шумо бо ҳамика пуртокатитон. Шавҳартона дуст доред асло фикри чудогира накунед.

  • Бале шумо сад дар сад хакки зиндаги кардан бо шавхари худро доред вале бояд зиндагиро дар чои дигар бо шавхаратон давом дихед, зеро он хушдоман максади хонавайронии шуморо дорад. У намегузорад бо шавхаратон шумо дар як хавли хечгох хушбахт бошед

  • Салом апаи мехрубон гуфтаи бародар Зафарро ман тарафдори мекунам. Лекин агар шавхаратон инсони боакл бошад талоки шуморо бояд натияд. Хуштомани шумо чазояшро мебинад мегуянд чизеро кошти хамонро медарави. Бо сабр бош апачон.

  • Авал худатон фикр кунед шавхаратон акавудодар дорад мумкин аст зиндагии алохида ташкил кунед холо якруз не якруз сари хушдоманатон ба девори лахат мерасад ба нохуни поятон зор мешаваад беакли накунед хонаи шавхаратон рафта якбор фахмонед ,,,,,,

  • Албатта бахти аввал бахт аст касе оиларо вайрон мекунад дар газаби Худо гирифтор мешавад туҳмат кунад ба туҳмат гирифтор мешавад зиндагиро бо дили пур давом диҳед аз паси гап нашаведу бахтатона фикр кунед.

  • Ассаломуалейкум апаҷон сабр кунед. Худи хушдоманатон пушаймон мешавад. Агар ҳамсаратонро дуст доред сабр кунед. Сабаби аз шумо хабардор нашудани ҳамсаратон ин ба фикрам хушдоманатон. У намехоҳад ки шавҳаратон аз ҳоли шумо хабардор шавад. Фикри ман ҳаминки сабр кунед иншшоолоҳ ҳамаш нағз мешавад. Меваи сабр ширин аст.

  • Сабр меваи ширин аст аммо шумо бояд аввал худро ба даст гирен. чунки инсон вакте худашро ба даст гирифта наметонад аз хама масалахо худро гунахкор мехисобад худро ба даст гиред. Сабр кнен.

    Додари шумо: Фаридун

  • Салом апачон илтимос шумо худатонро ба даст гиред. Сабр меваи ширини хает аст. чунки инсонхам метавонад зиндаги кунад ба чи хотир зиндаги мекунад. медонед барои аз имтихонхои Аллох гузаштан зиндаги мекнад. сабар кнен. апа……

    додари Шумо: Фаридун

Leave a Reply